काठमाडौं, माघ २५ थाइल्यान्डको एक शहर कोरात पनि भनिने नाखोन रचासिमामा शनिबार एक जुनियर सैनिकले गोली प्रहार गर्दा मारिनेको संख्या २० पुगेको छ भने अन्य कैयौं घाइते भएका छन्।
जक्राफन्थ थोम्मा नाम गरेका ती जुनियर सैनिक अधिकृतले आफ्नै कमान्डिङ अफिसरलाई मार्नुका साथै सैन्य शिविरबाट हतियार चोरेको अन्तर्राष्ट्रिय मिडियाहरुले जनाएका छन्।
त्यसपछि ती व्यक्ति एउटा सिटी सेन्टरमा पुगेर त्यहाँको एउटा सपिङ कम्प्लेक्समा छिरेको र त्यहिँ लुकेको बताइएको छ।
आक्रमणकारीले जथाभावी गोली प्रहार गर्नुकाे उद्देश्य थाह नभए पनि त्यसो गर्नुअघि सामाजिक सञ्जालमा पेस्तोलको तस्बिर तथा अन्य विभिन्न कुराहरु पोष्ट गरेका थिए।
आक्रमणकारीले सैन्य शिविरबाटै हतियार र गोलिगठ्ठा चोरी गरेर आक्रमण शुरु गरेको बताइएको छ।
त्यसपछि उनले विभिन्न ठाउँमा गोली प्रहार गर्दै टर्मिनल २१ नामको सपिङ सेन्टर पुगेका थिए।
आफ्नो गाडिबाट बाहिर निस्केर जथाभावी गोली प्रहार गरेको र अन्य मानिसहरु भागभाग गरेका दृष्यहरु स्थानीय सञ्चारमाध्यमहरुले देखाएका छन्।
सीसीटीभी दृष्यमा सो व्यक्ति राइफल उठाएर सपिङ सेन्टरभित्र बसिरहेको पनि देखिन्थ्यो।
‘सो बन्दुकधारीले मेशिनगनबाट गोली चलाउँदा निर्दोश व्यक्तिहरुको ज्यान गएको र कैयौं घाइते भएका छन्’ सरकारका प्रवक्ता कृस्सना पट्टानचारोएनले एएफपीलाई बताएका छन्।
रक्षा मन्त्रालयका प्रवक्ता लेफ्टिनेन्ट जर्नेल कंगचिप तन्त्रभनिचले सो गोलीप्रहारमा २० जनाको ज्यान गइसकेको बताए।
साे व्यक्तिले आक्रमण शुरु गर्नुअघि फेसबुकमा विभिन्न कुराहरु व्यक्त गरेकाे र तीनवटा गोलीसहित एउटा पेस्तोलको तस्वीर समेत पोस्ट गरेका थिए।
उनले ‘आत्मसमर्पण गरौँ कि नगरौँ’ अनि ‘अब चाहिँ उत्तेजित हुने बेला भयो’ लगायतका कुरा व्यक्त गरेको बताइएको छ।
