रौतहट । यही चैत १५ गते काठमाडौंको तीनकुनेमा भएको हिंसात्मक प्रदर्शनका क्रममा अराजक समूहले सञ्चारमाध्यम तथा सञ्चारकर्मीलाई लक्षित गरी आक्रमण गरेको घटनाप्रति नेपाल पत्रकार महासंघ रौतहट शाखाले गम्भीर आपत्ति जनाएको छ।
घटनाका क्रममा पत्रकार सुरेश रजकको आगलागीमा परि मृत्यु भएको छ भने अन्नपूर्ण पोस्ट दैनिकको कार्यालयमा आगजनी र ढुंगामुढा गरिएको छ। कान्तिपुर टेलिभिजन तथा हिमालयन टेलिभिजनलाई समेत क्षति पुर्याइएको छ। यस्तै, पत्रकार दिनेश गौतममाथि भएको आक्रमणका कारण उनको खुट्टा भाँचिएको छ भने फोटो पत्रकार निराज तामाङको क्यामेरा हराएको छ।
नेपाल पत्रकार महासंघले घटनाको गहिरो अनुसन्धान गरी दोषीहरूलाई फौजदारी कारबाही गर्न, मृतक पत्रकारका परिवारलाई क्षतिपूर्ति उपलब्ध गराउन, घाइते पत्रकारहरूको उपचार खर्च सरकारले व्यहोर्नुपर्ने माग अघि सारेको छ। महासंघले प्रमुख जिल्ला अधिकारीमार्फत नेपाल सरकारसमक्ष एक साताभित्र माग पूरा गर्न अन्यथा देशव्यापी आन्दोलन गर्ने चेतावनी समेत दिएको छ।
यसै सन्दर्भमा नेपाल पत्रकार महासंघ रौतहट शाखाले जिल्ला प्रशासन कार्यालय, रौतहटका प्रमुख प्रशासकीय अधिकृत मनिभूषण झालाई औपचारिक रूपमा विज्ञप्ति बुझाएको छ। विज्ञप्ति बुझाउने क्रममा मधेस प्रदेश नेपाल पत्रकार महासंघका प्रदेश सदस्य शैलेन्द्र झा, नेपाल पत्रकार महासंघ रौतहट शाखाका सहसचिव दिनेश यादव, अजित कर्ण, बिना श्रीवास्तव लगायतका पत्रकारहरूको उपस्थिति रहेको थियो।
