रौतहट । रौतहट जिल्लाको गौर नगरपालिका वडा नं. ५ स्थित सिया प्यालेस अगाडि प्रहरीको गस्ती टोलीले किटनाशक औषधी र गहुँ लोड गरिएका दुईवटा सवारी साधनलाई नियन्त्रणमा लिएको छ।
पुष २४ गते राति करिब ९:४५ बजे प्रहरी गस्ती टोलीले ना २ च ७७६१ नम्बरको पिकअपमा किटनाशक औषधी र ना २ त १६५० नम्बरको ट्र्याक्टरमा गहुँ लोड गरिएको अवस्थामा शंका लागि चेकजाँच गरेको थियो। जाँचका क्रममा गाडीमा रहेको सामान र बिल बिजक फरक देखिएपछि ती गाडीका चालकहरूलाई नियन्त्रणमा लिइएको हो।
नियन्त्रणमा लिइएका चालकहरूमा ट्र्याक्टर चालक ४५ वर्षीय संजिप यादव र पिकअप चालक ३० वर्षीय सुनिल यादव रहेका छन्। उक्त सामान, गाडी र चालकहरूलाई थप अनुसन्धानका लागि आन्तरिक राजस्व करदाता कार्यालय, गौर पठाइएको प्रहरीले जनाएको छ।
प्रहरी निरीक्षक उमाशंकर प्रसादका अनुसार यो घटनाबारे विस्तृत अनुसन्धान भइरहेको छ। प्रहरीका अनुसार, चोरीपैठारी वा राजस्व छलीको आशंकामा यस प्रकरणलाई विशेष ध्यान दिएर हेरिएको छ।
