सोमबार भारत प्रशासित जम्मु–कश्मीरको श्रीनगरस्थित जेवन क्षेत्रमा प्रहरीको गाडीमाथि विद्रोही समूहले आक्रमण गरेको छ। कश्मीर क्षेत्र हेर्ने प्रहरीले सामाजिक सञ्जाल ट्वीटरमार्फत उक्त आक्रमणको पुष्टि गरेको हो। यो आक्रमणमा घाइते भएका दुई प्रहरीको मृत्यु भएको बताएको छ।
प्रहरीका अनुसार अन्य १२ प्रहरी उक्त आक्रमणमा परी घाइते भएका छन्। उनीहरुको अहिले अस्पतालमा उपचार भइरहेको छ। अलजाजिराका अनुसार सोमबार प्रहरीले दुई चरमपन्थी इन्काउन्टरमा मारिएको दाबी गरेको थियो।
यद्यपि प्रत्यक्षदर्शीका अनुसार प्रहरीमाथि फयरिङ्ग नगर्दा नै प्रहरीले गोली चलाएको थियो। त्यसको केही समयपछि नै प्रहरीको बसमा आक्रमण भएको हो।
आक्रमणपछि घटनास्थल सिल गरिएको छ। गत साता कश्मीर भ्यालीको उत्तरी क्षेत्रमा पनि चरमपन्थी समूहले दुई प्रहरी अधिकारीको हत्या गरेको थियो।
