बर्दिवास // महोत्तरीमा प्रेमिकालाई हत्या गरेको आरोपमा प्रहरीले एक युवकलाई पक्राउ गरेको छ । पक्राउ पर्नेमा सर्लाहीको चक्रघट्टा-९ खोइरीयाका २५ वर्षीय मन्दिप कुमार यादव रहेको प्रहरीले जनाएको छ ।
असोज २३ गते बर्दिबास नगरपालिका- ५ टुटेश्वरमा २२ वर्षीया अनु रायलाई हत्या गरेको आरोपमा प्रहरीले उनकै प्रेमी यादवलाई पक्राउ गरेको हो । महोतरीको टुटेश्वर मन्दिरमा बिवाह गर्ने टुंगो लगाएर फर्किने क्रममा विवाद हुँदा प्रेमिका रायको हत्या गरेको आरोपमा उनकै प्रेमीलाई पक्राउ गरिएको प्रहरीले जनाएको छ ।
महोतरी अतराढ घर भई जनकपुर बस्दै आएकी अनुसंग मन्दिपको सानै उमेर देखि मन पराएको र दुबै जना बीच प्रेम भएपछि एक अर्का संग विवाह गर्न टुटेश्वर मन्दिरमा भेटर सहमति भएको थियो ।
विवाहको सहमति पछि अभिभावकलाई घरमा बोलाउने बिषयमा दुबैजना बीच बिवाद भएपछि एकअर्कालाई कुटपिट हुँदा युवतीको घटनास्थलमै मृत्यु भएको महोतरीका प्रहरी प्रवक्ता एवं प्रहरी नायव उपरीक्षक सन्तु लाल प्रसाद जैसवारले बताए ।
गत असोज २३ गते बर्दिबास नगरपालिका- ५ टुटेश्वरमा वेशारिसे अवस्थामा ती युवतीको शव फेला परेका थियो । टुटेश्वर मन्दिरबाट मृतक महिलासंग आरोपित संगै फर्किएको, टेम्पुमा संगै यात्रा गरेको भिडियो प्राप्त भएपछि अनुसन्धान गर्दै जादा यादवलाई बीरगंजबाट पक्राउ गरिएको प्रहरी नायव उपरीक्षक जैसवारले बताए । पक्राउ परेका यादवलाई कर्तव्य ज्यान मुद्धा दर्ता गरी थप अनुसन्धान भइरहेको प्रहरीले जनाएको छ ।
