वृन्दावनका मेयर पटेलले महत्वकांक्षी योजनाहरु ल्याँउदै ।

108

जेष्ठ १४ गते, रौतहट ।
रौतहटको वृन्दावन नगरपालिकाको नगर प्रमुखमा एकिकृत समाजवादी पार्टीबाट निर्वाचित रामविनोद पटेलले पदभार सम्हालेका छन् ।
पदभार ग्रहण गर्दै नवनिर्वाचित नगर प्रमुख पटेलले आफनो कार्यकालको शुरुवात जनताको मन जित्ने गरी आकर्षक योजनाहरुका साथ गर्न लागेको बताएका छन् ।
निर्वाचित जनप्रतिनिधिहरुलाई पद तथा गोपनियताको सपथ खुवाउँदै मेयर पटेलले जनताको विश्वासलाई आधार बनाएर प्रभावकारी एवं जनहितकारी कामबाट आफना कार्यकाल शुरु गर्न लागेको बताएका छन् ।
नगरलाई भ्रष्टाचारमुक्त पालिका बनाउनुका साथै शिक्षा, स्वास्थ्य, कृषि, उद्योग, पर्यटन, पूर्वाधार निर्माण लगाएत कार्यलाई आफनो पहिलो प्राथमिकतामा राखेर योजना ल्याउने उनले बताए ।
प्रसुति गृहको अभावमा कतिपय गर्भवति महिलालाई प्रसुति गराउन बाहिर लैजानुपर्ने बाध्यताका कारण अकाल्मै मृत्युवरण गर्नुपरेको अवस्थालाई मध्य नजर गर्दै नगरमा भएका प्रसुति गृहहरुलाई व्यवस्थित गर्नुका साथै प्रसुति गृह नभएको ठाउँमा प्रसुति गृह निर्माण गरी निशुल्क सेवा उपलब्ध गराउने निर्णय गरिएको उनले बताए ।
त्यसैगरी नगरपालिका भित्रबाट सम्पादन हुने पञ्जिकरण, जन्मदर्ता, विवाह दर्ता र मृत्यु दर्ता लगायत नागरिकताको सिफारिस निःशुल्क गर्ने समेत उनले बताए ।
पलिकाका अधिकांश व्यक्ति कृषि पेशामा नै आश्रित रहेकाले किसानलाई खेतीकिसानी गर्न सहज होस भन्ने उद्देश्यका साथ सिचाई नभएका ठाउँमा सिचाईको व्यवस्था गर्ने र सबै ठाउँमा विजुलीको व्यवस्था गरी विधुतीकरण गर्ने उनले बताए ।
त्यस्तै नगरमा विभिन्न उद्योग, कलकारखाना स्थापना गरी बेरोजगार युवाहरुलाई रोजगारी दिने उनले बताए ।
आफनो पाँच वर्षे कार्यकाल नगरको समृद्धि र विकासमा केन्द्रित गर्ने उद्धघोष गरेका नगर प्रमुख रामविनोद पटेलले प्रत्येक नगरवासीको भावना, चाहना र आवश्यक्ताको आधारमा कार्य गर्दै जाने बताए ।
नगरपालिकाको विकासको लागि कर्मचारीहरुको भूमिका अपरिहार्य भएकोले सहयोग गर्न अपिल गर्दै जनताको कार्यमा अलिकति पनि ढिला सुस्ती नगरी छिटोछरितो काम गर्न समेत उनले कर्मचारीहरुलाई निर्देशन दिए ।
जनताले दिएको जिम्मेवारी इमान्दारीपुर्वक निर्वाह गर्ने बताउँदै मेयर पटेलले आफनो कार्यकालमा कसैलाई पनि निराश हुन नदिने विश्वास दिलाएका हुन ।