रौतहट । रौतहटको राजदेवी नगरपालिका वडा नं. ५ स्थित पासवान टोलमा आइतबार मध्यराति भएको भीषण आगलागीबाट लाखौं मूल्यबराबरको सम्पत्ति नष्ट भएको छ। विद्युत सर्ट सर्किटका कारण बाबुलाल हजराको घरबाट सुरु भएको आगोले दिपेन्द्र पासवान, प्रदीप पासवान, र रामनाथ हजराका घरहरू पूर्ण रूपमा जलेर नष्ट भएका हुन्।
आगलागीको खबर पाएलगत्तै स्थानीय बासिन्दा, प्रहरी चौकी ब्रम्ह्पुरी, सशस्त्र प्रहरी बलको बीओपी बेलविछवा, र गौर नगरपालिकाको बारुण यन्त्रको सहयोगमा आगो नियन्त्रणमा लिइएको छ।
हालसम्म आगलागीबाट भएको मानवीय वा भौतिक क्षतिको विस्तृत विवरण प्राप्त हुन सकेको छैन। प्रारम्भिक अनुमानअनुसार, लाखौं रुपैयाँ बराबरको सम्पत्ति नष्ट भएको बुझिएको छ। आगलागीको थप विवरण घटनास्थलको विस्तृत निरीक्षणपछि सार्वजनिक गरिनेछ।
यस भीषण आगलागीले स्थानीय बासिन्दाहरूमा ठूलो आर्थिक क्षति र मानसिक तनाव उत्पन्न गराएको छ। आगलागी प्रभावित परिवारहरूले तत्काल सहयोगको माग गरेका छन्।
