गरुडा नगरपालिका २ को वडा कार्यालय तोडफोड गरेको आरोपमा १८ विद्यार्थी साधारण तारेखमा रिहा

465

रौतहट  माघ २३ // रौतहटको गरुडा नगरपालिका २ को वडा कार्यालय तोडफोड गरेको आरोपमा परेका १८ जना विद्यार्थी साधारण तारेखमा रिहा भएका छन्।

बिहीबार जिल्ला अदालत रौतहटको आदेशमा विद्यार्थीहरुलाई अभिभावकको जिम्मा लगाइएको हो। कम उमेरका विद्यार्थीहरु भएकाले हिरासत भित्र राख्न नसकिएको कारण पुनः हाजिर हुने गरी अविभाकलाई जिम्मा लगाउन अदालतले दिएको आदेश अनुसार गरिएको रौतहटका प्रहरी प्रवक्ता डिएसपी नविन कार्कीले जानकारी दिए।

उनका अनुसार वडा कार्यालयमा तोडफोड तथा क्षति पुर्याएकाले सार्वजनिक सम्पति तोडफोड अन्तर्गत अपराधिक उपद्रव मुद्दा लगाइ कारबाही प्रक्रिया अघि बढाइएको छ। पढाइ राम्ररी नभएको भन्दै स्थानीय श्रीमाध्यमिक विद्यालयका विद्यार्थीहरुले बुधबार दिउँसो गरुडाको २ नम्बर वडा कार्यालयमा तोडफोड गरेका थिए।

तोडफोडबाट वडा कार्यालयको महत्वपूर्ण कागजात, फर्निचर, कम्प्युटर लगायतको सरसमान नष्ट भएको छ। तोडफोड पश्चात ईलाका प्रहरी कार्यालय गरुडाले १८ जना विद्यार्थीलाई पक्राउ गरी हिरासतमा लिएको थियो।

बिहीबार उनीहरुलाई प्रहरीले जिल्ला अदालत रौतहटमा हाजिरी गराएको थियो । यसअघि पनि विद्यालयमा तोडफोड गरेकाले मनोबल बढेको भन्दै विद्यार्थीहरुमाथि मुद्दा चलाएको प्रहरीले जनाएको छ।